(ខេត្តកំពត)8/10/2025 បញ្ហាចាក់ស្រេះ នៃការរីករាលដាលល្បែងស៊ីសងអនឡាញ បង្ហាញពីភាពរីករាលដាលយ៉ាងគំហុកនៃសកម្មភាព ល្បែងស៊ីសងភ្នាល់តាមប្រព័ន្ធអនឡាញ (ដូចជាការភ្នាល់មាន់តាមអនឡាញ និងយោគី ១២ លេខ) ដែលកំពុងកើតមានឡើងស្ទើរគ្រប់ទីកន្លែង តាមភូមិ ឃុំ និងស្រុកនានា ក្នុងភូមិសាស្ត្រខេត្តកំពត។
ការលេងល្បែងទាំងនេះបានបង្កជាក្តីបារម្ភយ៉ាងខ្លាំងចំពោះប្រជាពលរដ្ឋ ដោយសារតែភាពងាយស្រួលក្នុងការចូលលេង និងលក្ខណៈញៀនរបស់វា ដែលធ្វើឲ្យអ្នកលេងជាប់ជំពាក់កាន់តែខ្លាំង។ទោះបីជាល្បែងស៊ីសងខុសច្បាប់ក្តី ក៏សកម្មភាពទាំងនេះហាក់ដូចជាត្រូវបានបើកឲ្យមានដំណើរការដោយគ្មានការរារាំងធំដុំណាមួយឡើយ។
ពលរដ្ឋមានការសោកស្តាយដោយឃើញថា ÷ សមត្ថកិច្ចនៃស្នងការដ្ឋាននគរបាលខេត្តកំពត ក៏ដូចជាអាជ្ញាធរដែនដី និងរដ្ឋបាលខេត្ត ហាក់ពុំទាន់បានយកចិត្តទុកដាក់ខ្ពស់ ឬចាត់វិធានការបង្ក្រាបជាប្រចាំ និងទាន់ពេលវេលានៅឡើយ។
ផលប៉ះពាល់យ៉ាងធ្ងន់ធ្ងរដល់គ្រួសារ និងសេដ្ឋកិច្ចសង្គម÷
*/ដើម្បីបញ្ជាក់ពីភាពសាហាវយង់ឃ្នងនៃផលវិបាកទាំងនេះ យើងសូមលើកយកករណីជាក់ស្តែងដែលបានកើតឡើងលើគ្រួសារពលរដ្ឋម្នាក់ក្នុងខេត្តកំពត៖
ការបែកបាក់គ្រួសារ និងជម្លោះ: ក្រុមគ្រួសាររបស់ពលរដ្ឋរូបនេះ រួមមានបងប្អូន និងម្តាយ បានក្លាយជា ជនរងគ្រោះ ដោយសារការញៀនល្បែងភ្នាល់មាន់តាមប្រព័ន្ធអនឡាញ។
ការញៀននេះបានបង្កឱ្យមាន ជម្លោះ និងទាស់ទែងគ្នាឥតឈប់ឈរ នៅក្នុងគ្រួសារ ដែលធ្វើឲ្យសន្តិភាព និងសុភមង្គលក្នុងផ្ទះត្រូវបានរលាយបាត់។
ការបំផ្លាញទ្រព្យសម្បត្តិទាំងស្រុង អ្វីដែលកាន់តែអាក្រក់ គឺសមាជិកគ្រួសារបានឈានដល់ការ លក់ខ្ទេចខ្ទីទ្រព្យសម្បត្តិទាំងអស់គ្មានសល់ ដើម្បីយកប្រាក់មកចាក់ល្បែង។
ការលក់ដូរនេះមិនមែនត្រឹមតែរបស់របរមានតម្លៃប៉ុណ្ណោះទេ គឺសូម្បីតែ មាន់ ដែលទើបនឹងញាស់ចេញពីសំបុក ដែលជាក្តីសង្ឃឹម និងចំណូលតូចតាចរបស់គ្រួសារ ក៏ត្រូវគេលក់យកមកលេងល្បែងដែរ។
នេះបញ្ជាក់យ៉ាងច្បាស់អំពី កម្រិតនៃការញៀនដ៏ហួសហេតុ ដែលនាំឲ្យគ្រួសារធ្លាក់ចូលទៅក្នុងភាពក្រីក្រយ៉ាងគំហុក និងជំពាក់បំណុលគេវ័ណ្ឌក។
ល្បែងស៊ីសងមិនមែនត្រឹមតែជា បញ្ហាបុគ្គលនោះទេ វាជា ជំងឺសង្គម ដែលបានធ្វើឲ្យប៉ះពាល់ដល់សណ្តាប់ធ្នាប់សាធារណៈ ជំរុញឲ្យមានអំពើចោរកម្ម និងអំពើហិង្សាក្នុងគ្រួសារ។
យោងតាមការបំផ្លាញធនធានគ្រួសារ និងការរំលោភសន្តិសុខសង្គមខាងលើ ក្រុមពលរដ្ឋសូមអំពាវនាវយ៉ាងទទូចទៅកាន់ រដ្ឋបាលខេត្តកំពត ជាពិសេសស្នងការដ្ឋាននគរបាលខេត្ត និងអាជ្ញាធរមូលដ្ឋាន សូមមេត្តាដាក់បញ្ហានៃការបង្ក្រាបល្បែងស៊ីសងតាមប្រព័ន្ធអនឡាញនេះ ជាវិធានការ អាទិភាព និងមានការយកចិត្តទុកដាក់ខ្ពស់បំផុត។
ការបង្ក្រាបមិនគួរធ្វើឡើងត្រឹមតែជាយុទ្ធនាការម្តងម្កាលនោះទេ តែត្រូវតែអនុវត្តជា វិធានការបន្តបន្ទាប់ ប្រកបដោយប្រសិទ្ធភាព និងចីរភាព។
បង្កើនការយល់ដឹង និងការអប់រំ៖ ផ្សព្វផ្សាយឲ្យបានទូលំទូលាយអំពីគ្រោះថ្នាក់នៃល្បែងស៊ីសង។
ពង្រឹងការស៊ើបអង្កេត និងការបង្ក្រាប៖ ដាក់កម្លាំងសមត្ថកិច្ចចុះល្បាត និងស៊ើបអង្កេតឲ្យដល់ទីតាំងលេងល្បែង (ទាំងរូបវន្ត និងអនឡាញ) ដោយមិនលើកលែង។
អនុវត្តច្បាប់ដោយតឹងរ៉ឹង៖ ចាត់វិធានការផ្លូវច្បាប់ប្រកបដោយតម្លាភាព និងភាពម៉ឺងម៉ាត់ ចំពោះអ្នករៀបចំ អ្នកផ្តល់ទីតាំង និងអ្នកលេងល្បែង ដើម្បីជាការព្រមានដល់អ្នកផ្សេងទៀត។
មានតែតាមរយៈការចូលរួមពីគ្រប់ភាគី ក្រោមការដឹកនាំ និងការដាក់ជាប្រធានការដំបូងរបស់រដ្ឋបាលខេត្តប៉ុណ្ណោះ ទើបអាចទប់ស្កាត់ និងកាត់បន្ថយគ្រោះមហន្តរាយនៃល្បែងស៊ីសងខុសច្បាប់នេះបាន ហើយនាំមកនូវសន្តិសុខ និងសណ្តាប់ធ្នាប់ត្រឡប់មកកាន់គ្រួសារ និងសង្គមជាតិវិញ។
ប្រភព.ICDTV Online
About the Author
